“حنا المغاربة شعب ما عندوش الكرامة”

qadaya 0 respond

zhor-baki-

– زهور باقي—

وصلنا لواحد الوقت اللي تا حاجة في هاد البلاد ماغادي تتغير… غير كنكبو الما في الرملة وكنحلمو… علاش؟

حنا شعب ولفنا العبودية والاستعباد والخنوع مستقرين على هاد الحالة.. ماعندناش الكرامة… غادي تقولو لي: الشعب ضحية لنظام تعليمي واقتصادي وثقافي وإعلامي كيخليه يقبل بالوضع وخاصنا نبدلو النظام السياسي باش نطورو الشعب.

غادي نقوليكوم: أن الكرامة مكاتتقرا تا فشي بلاصة، الكرامة مكايناش في المقررات الدراسية أو في البرامج التلفزيونية أو كاتدوز في الصالير من الشهر للشهر… الكرامة إحساس كينبع من الواحد فطري خاصو يحس بيه ينوض يهضر على حقو فاش يحس بكرامتو تقاست بلا تا شي خاجة…

نهار نحسو ونقدرو قيمة الكرامة نهار نقدرو نبدلو بزاف ديال الحاجات فهاد البلاد، نهار نقدرو قيمة الكرامة نهار نقدرو نردو منها عنف ثوري نتمردو بيه على أي واحد كيستعبدنا غادي نبدلو شي حاجة فهاد البلاد…

مناسبة هاد الهضرة هو فاجعة طانطان بقيت كنفكر فهاد الفواجع اللي كيوقعو فهاد البلاد وبقيت كنقول “وأنا ماااالي؟”.

نهار الملك أفرج على “دانييل كالفان” الشعب كيدافع على الضحايا في الزنقة وكيدافع على الأطفال وكياكل العصا وفي نفس الوقت كانو آباء وأمهات الضحايا في القصر الملكي يقبلون يد الملك ويركعون له وقبلوا بالتعويضات المالية اللي تمنحات ليهم بلا مايطلبو أو يضغطو أو يحاولوا يردوا حق ولادهم ولو بأضعف الإيمان ” الاحتجاج” ورفض مقابلة الملك والمطالبة بفتح نحقيق..

هادشي كيبينلي أنهم عائلات تتاجر في أبنائها.

نهار طاحو عمارات بوركون شنو وقع؟ العائلات اللي ماتو ليهوم أفراد أسرهم تحت التراب قبلوا بالوضع وقبلوا بمفاتيح شقق عطاها ليهوم الملك بيديه الكريمتين وما طالبوش بالمحاسبة أو فتح التحقيق أو معاقبة طريقة العمل البدائية لرجال الوقاية المدنية… شدو السوارت وسكتو وبقاو الدراري كياكلو الدق فساحة الحمام في كازا حيث مشاو يتضامنو ويجمعو ليهوم الحوايج…

نهار فيضانات كلميم.. سكان المنطقة المعنييين بالأمر اش دارو؟ يقدر يقولي شي حد اش دارو أكثر ناس معنيين بالفاجعة ” احتجو؟ ضغطو؟ تحركو؟ ناضو؟ مادارو والو … منطقة منكوبة وباقي غادي يعاودو يصوتو على نفس المتخبين المحليين ويعاودو يعطيو أصواتهم لنفس هادوك اللي كيعطيوها ليهوم كل نهار باش ياكلو ليهوم فلوسهم وميزانيتهم اللي من المفترض تمشي لإضلاح البنى التحتية

وصلنا لفاجعة كار طنطان وليدات صغار ماتو..والديهم وابائهم اللي باقي حيين اش دارو؟ اش صنعو؟ هوما الوحيدين اللي قادرين ينوضو يتحركو ويهضرو على اقتصاد الريع الي قتل ليهوم وليداتهم وديك الساعة نتجندو معاهوم ولكن هوما قبلو بمصاريف الدفن والعزاء والكفن وشي تعويضات مالية جاية في الطريق…

التعويضات المالية كتمتص الغضب، وكتقتل الكرامة، وكتساهم في الخنوع، وكتشجع على الفساد واستمرار احتكار الثروات ونعاودو ندورو في حلقة مفرغة…

الكرامة أساس الثورة … الكرامة ولو باعتصام ولو باضراب عن الطعام ولو برفع دعوى قضائية ولو بلائحة توقيعات، ولو بسخط محلي… ديرو شي حاجة في سبيل الكرامة.

الأثنين 13 أبريل 2015 03:20
Don't miss the stories follow- قضايا مراكش - and let's be smart!
Loading...
0/5 - 0
You need login to vote.

كلية العلوم والتقنيات بسطات و مؤسسة المغرب الرقمي يحتفلان باليوم العالمي للمرأة تحت شعار: ترابط، إبداع و احتفال.

معرض نادي الأم والطفل في نسخته السادسة يناقش ظاهرة التحرش النفسي داخل المدارس

Related posts
Your comment?
Leave a Reply